Alvaro Vila, novo voceiro e candidato socialista á presidencia na Deputación de Ourense

A EXECUTIVA PROVINCIAL DO PSDEG-PSOE NOMEA A ÁLVARO VILA, ALCALDE DE TABOADELA, NOVO VOCEIRO DO GRUPO SOCIALISTA E CANDIDATO Á PRESIDENCIA DA DEPUTACIÓN DE OURENSE

Vila, que tamén é vicesecretario provincial do PSOE, naceu en Taboadela en 1965, onde é rexedor desde 2019 tras revalidar o bastón de mando nos comicios de maio cunha ampla maioría absoluta

Villarino explica que a reunión da CEP celebrada onte adoptou esta decisión “por unanimidade”, o que tamén “referendou a decisión dos seus compañeiros e compañeiras do novo Grupo Provincial Socialista”

Ourense, 13 de xullo de 2023. A Executiva Provincial (CEP) do PSdeG-PSOE vén de nomear a Álvaro Vila, actual alcalde de Taboadela e vicesecretario xeral do partido na provincia, novo voceiro do Grupo Socialista da Deputación de Ourense e candidato á presidencia desta institución.

O secretario provincial, Rafa Villarino, explica que a reunión da CEP celebrada onte á noitiña adoptou esta decisión “por unanimidade”, o que tamén “referendou a decisión dos seus compañeiros e compañeiras do novo Grupo Socialista na deputación, que adoptaron esta semana a mesma decisión”. “É unha decisión de acordo pleno e dun novo rumbo no Partido Socialista” na institución, que, indica, “seguirá apostando polo plan único, polo reparto equitativo e pola xustiza social que a provincia merece”, destaca o secretario.

Declaracións de Rafa Villarino

Vila naceu en Taboadela no ano 1965, onde é rexedor desde 2019, tras lograr o apoio maioritario da veciñanza e da corporación local fronte ao que, naquel momento, era o alcalde máis lonxevo da comunidade autónoma, Manuel Gallego, que gobernaba este municipio da área metropolitana da terceira cidade de Galicia ininterrompidamente desde 1972. Nas pasadas eleccións municipais de maio de 2023, o novo voceiro provincial do PSdeG-PSOE revalidou o posto de primeiro edil en Taboadela cunha ampla maioría absoluta.