OS E AS SOCIALISTAS DE OURENSE LEVARÁN AO PLENO DO PARLAMENTO DE GALICIA UNHA PROPOSICIÓN NON DE LEI PARA QUE A XUNTA SE POSICIONE ANTE OS RECORTES NAS UNIS ANUNCIADOS POR JÁCOME
Sinalan que dito anuncio incumpre o Decreto 99/2012 e afecta ao “tratamento confidencial dos datos” dos e das usuarias ao non poder ser atendidas adecuadamente e “co respecto debido a súa dignidade, intimidade e autonomía”
“Pedimos ao señor Rueda que interceda de xeito inmediato para que isto deixe de acontecer e se blinden os servizos sociais, tan importantes para a cidadanía nestes momentos”, defende a deputada Marina Ortega
Ourense, 13 de novembro de 2023. Logo de que se denegara o debate dunha moción de urxencia na sesión plenaria ordinaria de outubro do Concello de Ourense, e que se instase ao goberno de Jácome a manter as catro UNIS actuais abertas, a través dun pleno extraordinario que tivo lugar este mes -promovido polo PSOE e o BNG-; o grupo parlamentario socialista presentou unha proposición non de lei para o seu debate ante o presidente da Xunta, Alfonso Rueda.
Nela, os e as deputadas do PSdeG reclaman ao executivo autonómico que se posicione e actúe en base ao cumprimento da lei 13/2008 sobre o anuncio de recortes nas Unidades Interdisciplinares de Intervención Social da cidade (Casco Vello, Centro, A Ponte e O Couto) para que se garantice a proximidade á cidadanía máis vulnerable cun trato individualizado.
“As UNIS contan no seu cadro de persoal con traballadores/as e educadores/as sociais e persoal administrativo, que tramitan solicitudes de axuda a domicilio, atención e recoñecemento da dependencia, emerxencias ou prestacións económicas, así como a detección de casuísticas de maltrato ou desamparo en menores”, sinala a deputada Marina Ortega que asinou a iniciativa xunto a Xulio Torrado e Luis Manuel Álvarez.
O pasado 26 de setembro, o rexedor expuña a través dun comunicado de prensa a súa intención de agrupar toda a área social do Concello de Ourense nunha soa sede, que sería o edificio municipal da praza de San Martiño, para posteriormente afirmar que mantería só dúas destas dependencias.
Neste senso, os e as socialistas lembran que hai que ter en conta a normativa existente e que este anuncio incumpre o Decreto 99/2012, do 16 de marzo, afectando ao “tratamento confidencial dos datos” dos e das usuarias ao non poder ser atendidas adecuadamente e “co respecto debido a súa dignidade, intimidade e autonomía”, segundo expón o texto legal.
Tamén se recolle no decreto que estes lugares deben contar cun “espazo separado que permita a privacidade nas entrevistas e reunións necesarias para a intervención social individualizada” e cun “espazo de reunións proporcionado ás características e dimensións da poboación atendida”.
“Por todo, pedimos ao señor Rueda que interceda de xeito inmediato para que isto deixe de acontecer e se blinden os servizos sociais, tan importantes para a cidadanía nestes momentos, tendo en conta que despois da pandemia supuxeron un sobrecusto nos concellos de máis de máis de 6 millóns de euros mensuais, segundo a FEGAMP, por asumir competencias impropias”, incidiu Ortega diante da UNIS Centro, na rúa Bernardo Cachamuíña, que pecharía tralo anuncio feito por Jácome.
PSdeG-PSOE de Ourense 