A AGRUPACIÓN MUNICIPAL DO PSDEG DE OURENSE CONVIDA Á CIDADANÍA A PARTICIPAR NA ELABORACIÓN DUN MAIO, NA SEDE DO PARTIDO, O VENRES E O SÁBADO
“O ano pasado participamos no certame por primeira vez e puidemos donar o recadado á Asociación Española Contra o Cancro (AECC). A experiencia foi moi gratificante”, sinala a secretaria xeral do PSOE, Natalia González
Nesta ocasión, o maio da Agrupación Municipal levará por nome ‘Ourense infinito’ e as e os socialistas desexan convidar tamñen á cidadanía a cantar a copla o propio domingo
Ourense, 2 de maio de 2024. Dende a Agrupación Municipal do PSdeG-PSOE de Ourense queren convidar á cidadanía a participar nunha das festas tradicionais máis importantes para a cidade: os maios. Por este motivo, a secretaria xeral, Natalia González Benéitez, explica que este ano abrirán as portas de sede do partido (na rúa Ribeira de Canedo, nº 24-26) para todas aquelas persoas que se animen á elaborar ou queiran aprender como é o proceso.
“O ano pasado participamos no certame por primeira vez e puidemos donar o recadado á Asociación Española Contra o Cancro (AECC). A experiencia foi moi gratificante e quixemos repetir achegándonos máis á cidadanía. Os e as que o desexen poderán vir á nosa sede mañá pola tarde, a partir das 17.00 horas, e o sábado, a partir das 18.00 horas”, afirma a tamén portavoz do grupo municipal socialista.
O maio deste ano da Agrupación Municipal levará por nome ‘Ourense infinito’ e as e os socialistas desexan convidar á cidadanía a cantar a copla o propio domingo, 5 de maio, na rúa do Paseo e desfrutar do ambiente festivo.
“As nosas coplas imos cantar
neste día de lecer
temos moito que dicir
sobre o que está a acontecer.
Sobre o que está a acontecer
na nosa bela cidade,
tanta tolemía
xa non hai quen a pare”.
PSdeG-PSOE de Ourense 