COMUNICADO DO PSDEG-PSOE PROVINCIAL DE OURENSE POLO FALECEMENTO DE ELADIO OSORIO CASTRO, EX ALCALDE SOCIALISTA DE CASTRO CALDELAS
Ourense, 9 de xaneiro de 2025. O PSdeG-PSOE de Ourense amosa a súa “profunda” dor tras coñecerse o falecemento de Eladio Osorio Castro, alcalde de Castro Caldelas entre 1987 e 1996 e de 1999 a 2014, sendo ademais concelleiro do municipio dende 1983.
Dende o PSOE Provincial destacan o “compromiso” de Eladio Osorio con Castro Caldelas e co Partido Socialista, durante todos os anos nos que estivo ao fronte do consistorio e tamén posteriormente. “Fóisenos unha persoa exemplar e excelente, sempre entregada ao partido e ao benestar da veciñanza”, lamentan as e os socialistas.
“Acabamos de ser privados da súa amable compaña, mais quédanos a memoria, e permanece para sempre o legado do seu traballo e compromiso políticos”, destacan dende o PSdeG-PSOE Provincial de Ourense. As e os socialistas sinalan o carácter de Eladio do que afirman “era unha persoa sempre disposta a axudar á veciñanza e que traballou sempre por Castro Caldelas e as súas xentes”.Dende o PSdeG-PSOE Provincial de Ourense trasladan as súas fillas e fillos, así como ao resto de familiares, amizades e militantes socialistas de Castro Caldelas a fonda pesar das e dos socialistas da provincia neste duro transo de perda e dor.
PSdeG-PSOE de Ourense 