AS E OS SOCIALISTAS DO CONCELLO DE OURENSE RECLAMAN QUE O GOBERNO DE JÁCOME SOLICITE OS INFORMES TÉCNICOS E XURÍDICOS PERTINENTES PARA REABRIR AS TERMAS DO MUÍÑO CANTO ANTES
“A última palabra para poder manter abertas esas termas ten que estar abalada tamén polos informes xurídicos dos técnicos municipais para poder levarse a cabo esa solución plantexada pola Xunta de Galicia, con todas as garantías legais para a propia institución”, afondou a voceira do PSdeG, Natalia González
“Dende o PSOE, do mesmo xeito que trasladamos nesta reunión, reclamamos que unha vez que se pidan os informes xurídicos pertinentes se nos reúna ás portavoces da oposición, ás representantes de cada partido, e que tomemos entre todas a decisión que mellor responda aos intereses da veciñanza”, aclarou
Ourense, 3 de xuño de 2025. Logo de que o alcalde, Gonzalo Pérez Jácome, convocase unha Xunta de Voceiros, o xoves 29 de maio, para informar da chegada dunha comunicación da Xunta de Galicia que ordeaba o peche permanente ou a recomendación de non bañarse nas Termas do Muíño da Veiga porque non se adapta á Lei Termal de 2019, esta mañá tivo lugar unha reunión na que participaron representantes de ámbalas dúas institucións e os e as portavoces dos grupos con representación política no Concello de Ourense.
Segundo explicou o rexedor a semana pasada, as termas non se poden adaptar porque non se poden declarar como augas mineiromedicinais e tampouco se poden canalizar e declarar como augas de baño, porque tamén se iniciou o procedemento no ano 2022 e foi denegado ao non tratarse de augas superficiais e confinadas. Todo elo dificulta que coa normativa actual -que as e os socialistas lembran que se elaborou de costas á cidade de Ourense e aos seus intereses e que favorece a outras infraestruturas privadas, prexudicando claramente o termalismo público- que este ben natural poida ser reaberto para foráneos e turistas.
«Temos que agradecer ao delegado territorial da Xunta, Manuel Pardo, e aos e ás traballadoras da Administración autonómica, así como ao alcalde, que se reuniran con nós hoxe e o que propoñen é unha posible solución para non vernos obrigados ao peche permanente das termas do Muíño. Dentro do que foi a reunión iso foi positivo. Pero agora a pelota está no tellado do Concello de Ourense”, valorou a voceira do grupo do PSdeG, Natalia González, ao remate do encontro.
“A última palabra para poder manter abertas esas termas, que é algo que desexamos e no que coincidimos todos e todas, ten que estar abalado tamén polos informes xurídicos dos técnicos municipais para poder levarse a cabo esa solución plantexada pola Xunta de Galicia, con todas as garantías legais e sen que supoña unha responsabilidade patrimonial para a propia institución”, afondou sobre os pasos que se deberían dar a continuación.
“Dende o PSOE, do mesmo xeito que trasladamos nesta reunión, reclamamos que unha vez que se pidan os informes xurídicos pertinentes se nos reúna ás portavoces da oposición, ás representantes de cada partido, e que tomemos entre todas a decisión que mellor responda aos intereses da veciñanza e teña todas as garantías legais”, rematou ante os medios de comunicación.
PSdeG-PSOE de Ourense 