O secretario provincial socialista, Álvaro Vila, acompañou na mobilización cidadá convocada na Gudiña pola Plataforma Dereito ao Tren xunto con alcaldes e representantes socialistas das comarcas afectadas.
Vila salienta o éxito da convocatoria cidadá e reafirma o compromiso da súa formación coa “recuperación de frecuencias en horarios útiles que, permitan conectar o rural ourensán co resto do país».
«Os socialistas non viñemos coma partido político, senón como veciños que defendemos o futuro das nosas comarcas», subliñou Vila, louvando o traballo da Plataforma Dereito ao Tren.
A Gudiña, 2 de agosto de 2025. O PSdeG-PSOE de Ourense participou activamente na manifestación masiva convocada pola Plataforma Dereito ao Tren que congregou esta tarde na Gudiña a milleiros de persoas na defensa dun servizo ferroviario digno para as comarcas do oriente da provincia. O secretario provincial, Álvaro Vila, acompañado por alcaldes e alcaldesas, amais de representantes socialistas dos territorios afectados polos recortes de frecuencias, sumouse á mobilización cidadá que percorreu o traxecto simbólico entre a Estación Vella e a moderna estación A Gudiña-Porta de Galicia.
Segundo Vila, «hoxe a cidadanía do rural ourensán pronunciouse alto e forte, dando unha lección de dignidade e unidade que debe ser escoitada desde Madrid. Esta manifestación é a proba contundente de que cando a xente se organiza e loita polos seus dereitos fundamentais, pode conseguir que se lle preste atención a problemáticas que afectan directamente á vida real das persoas». O dirixente socialista destacou que a mobilización «supera con moito as expectativas e demostra que o rural galego non está disposto a aceptar o abandono institucional».
Ampla representación socialista
Na manifestación participaron representantes socialistas de concellos directamente afectados polos recortes de frecuencias ferroviarias, encabezados polo alcalde da Gudiña, que ten sido un dos máis dinámicos na mobilización desde o inicio das protestas. Xunto a el, estiveron presentes representantes socialistas de Verín, Laza, Riós, A Mezquita, Viana do Bolo, Petín, Vilamartín e O Barco de Valdeorras, así como de concellos do oriental ourensán e da comarca de Valdeorras, territorios que sofren as consecuencias dunha planificación ferroviaria que deixa sen opcións de mobilidade real á poboación. A alcaldesa de
Evidenciando o apoio do PSdeG-PSOE tamén a nivel galego, entre os manifestantes atopábase a secretaria de organización nacional da formación, Lara Méndez, amais de representantes electos en Cortes e no Parlamento de Galicia. Como parte da campaña de apoio á manifestación, durante as xornadas previas os socialistas lanzaron un vídeo coral no que participan alcaldes e representantes socialistas de máis dunha ducia de concellos afectados. O vídeo, que contou coa participación do secretario xeral do PSdeG-PSOE, Xosé Ramón Gómez Besteiro, recollía diferentes voces dos territorios que sofren as consecuencias dos recortes baixo o lema «As nosas voces polo tren que merecemos».
«Os socialistas non viñemos aquí como partido político, senón como veciños que defendemos o futuro das nosas comarcas e a supervivencia dos nosos pobos. A loita da Plataforma Dereito ao Tren é xusta e absolutamente necesaria, e ten todo o noso apoio institucional e persoal», subliñou Vila. O dirixente socialista denunciou que «resulta paradóxico e inxustificable ter unha infraestrutura moderna e custosa como a estación Porta de Galicia e uns horarios que a converten nunha instalación practicamente inútil para a vida cotiá da xente».
Demandas concretas e xustificadas
O secretario provincial explicou que a manifestación «non pide luxos nin privilexios desmesurados, senón algo tan básico e elemental como horarios que permitan ir e volver a Madrid nun mesmo día, chegar a tempo ás citas médicas, que os nosos estudantes poidan desprazarse dentro da provincia e da comunidade sen depender exclusivamente do coche privado, ou que as familias poidan acceder a servizos básicos sen verse penalizadas pola súa residencia rural».
Vila lamentou con contundencia que «os recortes ferroviarios están a obrigar ás familias a gastos extraordinarios en combustible, aparcamento e peaxes que non todas poden asumir, creando así unha barreira económica adicional ao xa grave illamento territorial que padecen estas comarcas». O dirixente socialista alertou de que «estamos asistindo a unha discriminación territorial inadmisible que atenta contra os principios básicos de cohesión e equidade».
Compromiso inquebrantable co futuro do rural
O secretario provincial do PSdeG-PSOE reafirmou con rotundidade que «Galicia precisa un rural vivo, próspero e conectado co resto do país e de Europa. Sen un servizo ferroviario eficaz e adaptado ás necesidades reais da poboación, estamos a condenar estas comarcas históricas ao despoboamento acelerado e ao abandono definitivo». Para Vila, «a manifestación de hoxe, á que acudiron milleiros de persoas de diferente condición e orientación política, demostra de forma irrefutable que o rural non se rende, que ten voz propia e que seguirá loitando con determinación por un tren que sexa realmente útil, digno e ao servizo da súa xente».
O socialista fixo especial fincapé en que «esta non é unha reivindicación puntual, senón unha loita estrutural polo futuro do rural galego que conecta coa histórica defensa socialista da igualdade territorial e dos servizos públicos de calidade para todos os cidadáns, independentemente do lugar onde residan».
A manifestación rexistrou unha participación masiva que evidencia o amplo respaldo social ás reivindicacións da Plataforma Dereito ao Tren para a recuperación inmediata das frecuencias suprimidas e o establecemento de horarios verdadeiramente útiles na estación A Gudiña-Porta de Galicia. Coa participación de milleiros de persoas, a mobilización consolídase como un marco histórico na defensa dos dereitos de conectividade do rural ourensán.
PSdeG-PSOE de Ourense 