O PSDEG-PSOE DE OURENSE SOLICITA DA DEPUTACIÓN TRANSPORTE GRATUÍTO DESDE OS CONCELLOS AFECTADOS POLOS LUMES PARA ACUDIR AO PARTIDO BENÉFICO DO CELTA E A SELECCIÓN OURENSÁ A PROL DA PROVINCIA
A iniciativa forma parte do compromiso dos socialistas coa recuperación dos territorios ourensáns devastados polos incendios do pasado mes de agosto
O voceiro do PSdeG-PSOE na Deputación, Álvaro Vila, destaca que esta medida democratiza o acceso á convocatoria solidaria e maximiza o potencial recadatorio do evento
O secretario provincial dos socialistas de Ourense salienta que o «Xuntos contra o lume» representa un exemplo de compromiso cívico e territorial para co noso territorio
Ourense, 16 de setembro do 2025. O deputado e voceiro do Grupo Provincial Socialista da Deputación de Ourense, Álvaro Vila, presentou unha proposta de acordo para que a institución provincial sufrague o transporte en autobús desde os concellos e parroquias máis afectados polos incendios forestais do pasado mes de agosto ata o estadio Abanca Balaídos para asistir ao partido benéfico «Xuntos contra o lume» do vindeiro 8 de outubro. Vila sinalou que esta iniciativa “persegue democratizar o acceso a unha convocatoria solidaria que destinará a totalidade do recadado á reforestación e recuperación dos montes ourensáns tralos devastadores lumes do verán”.
O voceiro socialista explicou que os incendios forestais do pasado agosto provocaron un impacto sen precedentes no territorio provincial, “afectando gravemente ás poboacións rurais, ao sector primario e ao medio ambiente”. Vila subliñou que os lumes deixaron “un regueiro de destrución que abrangue miles de hectáreas de monte, cultivos e pasteiros, comprometendo seriamente a sustentabilidade económica de moitas familias e a conservación do patrimonio natural ourensán”. O secretario provincial socialista destacou a importancia da iniciativa posta en marcha polo RC Celta de Vigo, xunto coa Real Federación Galega de Fútbol e a UD Ourense, cualificándoa como un exemplo de compromiso cívico e territorial que merece todo o apoio institucional.
A proposta socialista contempla tamén o establecemento dun sistema de reserva gratuíto das prazas de transporte, priorizando ás persoas residentes nas zonas directamente afectadas polos lumes e prestando especial atención aos colectivos con maiores dificultades de mobilidade. Vila remarcou que a Deputación Provincial “ten a responsabilidade institucional de liderar e apoiar activamente todas aquelas iniciativas que contribúan á recuperación integral do territorio provincial”. O deputado subliñou que facilitar o transporte gratuíto desde as zonas sinistradas non só democratiza o acceso a esta importante convocatoria solidaria, senón que ademais maximiza o potencial recadatorio en beneficio directo da recuperación da provincia.
Compromiso continuado cos concellos afectados
O voceiro do PSdeG-PSOE destacou que esta iniciativa enmárcase no traballo continuado do Grupo Provincial Socialista a prol dos concellos afectados polos incendios do pasado agosto. Vila lembrou que “desde o primeiro momento os socialistas traballaron para dar resposta ás necesidades dos territorios máis castigados polos lumes, impulsando medidas de apoio e recuperación que permitan restablecer a normalidade nas zonas afectadas”. O deputado sinalou que a colaboración institucional resulta fundamental para articular unha resposta eficaz ante situacións de emerxencia como a que atravesou a provincia durante o verán.
A proposta inclúe tamén a realización da correspondente difusión desta iniciativa a través dos concellos concernidos e dos medios de comunicación da provincia, “para garantir o maior coñecemento posible desta convocatoria e que teña o meirande impacto solidario”. Vila solicitou ademais que se dea traslado do acordo ao RC Celta de Vigo, á Real Federación Galega de Fútbol e aos concellos afectados polos incendios, para coordinar axeitadamente esta iniciativa de apoio ás zonas sinistradas. O responsable socialista concluíu sinalando que esta medida responde ao principio de solidariedade intercomarcal que debe presidir a actuación das institucións provinciais, “nomeadamente en situacións de emerxencia como a que atravesou o noso territorio ourensán”.
PSdeG-PSOE de Ourense 