En apoio ás familias e aos praceiros e praceiras e en defensa dunha solución inmediata para a Praza de Abastos e a Alameda
Ourense, 28 de novembro de 2025. O grupo municipal socialista do Concello de Ourense quere expresar o seu máximo apoio ás familias, ás praceiras e aos praceiros que nestes días están vivindo unha situación de incerteza absolutamente inxusta. O noso compromiso é firme: traballar para unha saída razoable, acordada e inmediata que permita desaloxar a Alameda, avanzar no traslado temporal e abrir de novo a Praza de Abastos devolvéndoa á actividade comercial que Ourense necesita.
Toda a cidade é consciente de que existe vontade das partes para avanzar: hai coincidencia política, hai coincidencia social e hai disposición de fondos por parte da Xunta, da Deputación e dos propios praceiros. Agora é imprescindible pechar e formalizar o compromiso económico e administrativo entre todas as institucións implicadas para garantir a viabilidade do proxecto e a súa continuidade no tempo.
Neste contexto, é evidente que Ourense non pode permanecer máis tempo bloqueado. A cidade leva anos á espera de recuperar un dos seus espazos máis emblemáticos, e resulta fundamental evitar decisións ou movementos que poidan atrasar ou comprometer un proceso no que tantas persoas teñen depositadas as súas esperanzas e o seu traballo.
Dende o grupo municipal socialista queremos deixar claro que o noso único obxectivo é que Ourense avance, protexendo o emprego de máis de 200 familias e asegurando a recuperación inmediata dun espazo comercial e social fundamental. A cidade necesita estabilidade, cooperación institucional e responsabilidade, e non máis incertezas nin confrontacións estériles.
Por iso, reiteramos a nosa disposición absoluta ao diálogo e á colaboración co resto das forzas políticas e co conxunto das administracións. PP, PSdeG, BNG e DO temos a capacidade —e o deber— de contribuír a unha solución seria, pactada e viable. O prioritario é garantir os acordos necesarios para que a Praza de Abastos poida reabrir e a Alameda recupere o seu uso público con todas as garantías.
Ourense merece avanzar e recuperar xa a súa Praza de Abastos.
PSdeG-PSOE de Ourense 