Concello de Ourense Denuncias

Denunciamos o «negocio» de Jácome cos cartos de todos os ourensáns

O PSDEG-PSOE DE OURENSE DENUNCIA O NEGOCIO QUE ESTÁ A FACER JÁCOME E DEMOCRACIA ORENSANA COS CARTOS DE TÓDOLOS CIDADÁNS DAS ARCAS MUNICIPAIS

Os socialistas denuncian a falta de asistencia ás xuntas de Área dos concelleiros delegados con dedicación exclusiva, “obstaculizando” á oposición

Dende o grupo municipal critican tamén a “negativa” do alcalde á proposta de toda a oposición ao reorganizamento das xuntas de área para tomar medidas e solventar a situación

Ourense, 9 de xuño de 2020. O Grupo Municipal Socialista do Concello de Ourense denuncia a negocio que mantén montado Jácome e Democracia Orensana co diñeiro das arcas municipais de tódolos contribuíntes do Concello. Este negocio supón un dispendio que chega a superar os 30.000€ dende o inicio do mandato, hai un ano, e que é derivado en asesores e nos concelleiros delegados nas xuntas de área nas que soamente 2 concelleiros –o concelleiro de Cultura e a concelleira de Educación- son os que acumulan tódalas vogalías e presidencias das xuntas de área, sendo, casualmente, os dous concelleiros do grupo de goberno de DO que non contan con dedicación exclusiva.

Os socialistas denuncian que o grupo de goberno do alcalde, Jácome, está a instrumentalizar as xuntas de área para “obstaculizar” a labor fiscalizadora da oposición e convertelas nun negocio para os seus concelleiros que carecen de dedicación exclusiva. Dende o seo socialista aseguran que esta ferramenta lles sirve para que tanto a concelleira de Educación como o concelleiro de Cultura, obteñan un “soldo en dietas de asistencia” – os dous concelleiros son acumulan 3 vogalías 2 presidencia nas xuntas e ao mesmo tempo tamén son vogais no Consello Municipal de Deportes- o cal chega a ascender a máis de 2.000€ ao mes, «a maiores da remuneración que xa perciben como funcionarios de ensino».

Os socialistas recordan que en ámbolos dous casos, tanto Maite Rodríguez como Mario González, seguen mantendo as súas “obrigas e soldos” nos centros de ensinanza nos que imparten clase. Desde o grupo municipal cuestionan «a dificultade para cumprir coas súas obrigas laborais como funcionarios docentes e o seu exercicio político como concelleiros do grupo de goberno, estando en media ducia de xuntas de área e sen solicitar ningún tipo de adicación, parcial ou total, ao concello» e insisten en que «a adicación exclusiva non é para deixar de adicarse as súas responsabilidades nas xuntas de área relacionadas co desempeño das súas funcións».

Este negocio coas xuntas de Área reflíctese tamén na “non asistencia dos concelleiros delegados de cada área as súas xuntas correspondentes”, aseguran os socialistas, negándose en repetidas ocasións e remitindo a que eles “cobran a adicación exclusiva e non teñen por qué ir”, como asegurou a concelleira de Seguridade Cidadá e Comercio, María Dibuja, quen soamente asistiu a unha xunta das súas áreas, das máis de 20 que se levan celebrado. Mentres o que fan é evadir as súas responsabilidades como concelleiros da terceira cidade de Galicia, á vez que “enchen os seus bolsillos”. O mesmo acontece co resto de concelleiros de Democracia Orensana- Armando Ojea, Miguel Caride e Manolo Álvarez- e co tenente alcalde e concelleiro de Medio Ambiente, Jorge Pumar, dos cales soamente Caride asistiu ás 4 primeiras xuntas de infraestruturas.

Dende o grupo municipal socialista recordan a “iniciativa conxunta presentada por toda a oposición” na pasada xunta de voceiros celebrada no mes de marzo, previa ao Estado de Alarma provocado pola crise da COVID-19 para que se poidan reorganizar as Xuntas de Área e a cal, o alcalde, Gonzalo Pérez Jacome, se “negou a incluír e atender” como unha mostra máis do seu  “abuso de poder”, “falta de interese polos cidadáns e lealdade institucional” e , principalmente, como unha mostra máis de que o único que lle interesa é o seu rédito persoal e o “chiringuito” que está a montar do Concello para que él e os seus “amiguetes se vexan lucrados”.