BESTEIRO CHAMA A OURENSE A SER DECISIVA O 29N PARA IMPEDIR QUE PP E VOX POÑAN EN RISCO AS PENSIÓNS E OS DEREITOS SOCIAIS
Lembra que os socialistas quedaron a só 3.000 votos de conseguir un segundo deputado pola provincia, un escano fundamental para reforzar a maioría progresista no Congreso. Fronte a esa posibilidade real, sinalou que outras formacións obtiveron catro veces menos votos e están lonxe de poder disputar ese deputado
Advirte de que as eleccións do 29N serán determinantes para o futuro das 100.000 persoas que cobran unha pensión en Ourense e para toda a economía da provincia”
Carmen Rodríguez Dacosta e María Fernández Ojea encabezan as candidaturas ao Congreso e ao Senado co compromiso de levar a voz de Ourense ás Cortes Xerais e defender os avances sociais fronte ás ameazas da dereita
Ourense, 4 de novembro de 2026. O secretario xeral do PSdeG, José Ramón Gómez Besteiro, chamou hoxe a Ourense a desempeñar un papel decisivo nas eleccións xerais do próximo 29 de novembro para impedir que PP e Vox cheguen ao Goberno e poñan en risco as pensións públicas e os dereitos sociais conquistados durante os últimos anos.
Na presentación das candidaturas socialistas ao Congreso e ao Senado, encabezadas respectivamente por Carmen Rodríguez Dacosta e María Fernández Ojea, advertiu de que a provincia ten moito en xogo nestas eleccións e reivindicou a candidatura socialista como a única alternativa capaz de frear á dereita e á extrema dereita.
Besteiro situou a defensa das pensións públicas no centro do debate electoral en Ourense, onde preto de 100.000 persoas perciben unha pensión e estas prestacións representan arredor dun terzo da economía que entra nos fogares. Unha realidade que, segundo advertiu, fai especialmente preocupantes as intencións de PP e Vox de recortar os dereitos sociais.
“Son pensións que son froito do traballo e das cotizacións dos traballadores e traballadoras e que agora están ameazadas”, sinalou, antes de alertar de que a chegada da dereita e da extrema dereita ao Goberno podería supoñer un retroceso sen precedentes para unha provincia na que as pensións públicas teñen un peso fundamental na economía e na vida de miles de familias.
O líder socialista advertiu de que o 29N a cidadanía terá que elixir entre dúas opcións claramente diferenciadas. Por unha banda, un Partido Socialista que traballa para ampliar dereitos, impulsar o crecemento económico e repartir a prosperidade. Pola outra, un bloque formado por PP e Vox que ameaza con facer retroceder os avances acadados nos últimos anos.
“PP e Vox xa nin sequera se preocupan de que a xente non os vexa como unha cousa diferente. Son o mesmo”, afirmou Besteiro, que contrapuxo a esa alianza un proxecto socialista baseado na defensa dos servizos públicos, a igualdade de oportunidades e a mellora das condicións de vida da maioría social. Neste escenario, fixo un chamamento a concentrar o voto progresista no Partido Socialista, convencido de que Ourense pode ser decisiva para impedir un Goberno de Feijóo e Abascal.
Besteiro lembrou que nas últimas eleccións xerais os socialistas quedaron a apenas 3.000 votos de conseguir un segundo deputado pola provincia, un escano que considera fundamental para reforzar a maioría progresista no Congreso. Fronte a esa posibilidade real, sinalou que outras formacións, como o BNG, obtiveron catro veces menos votos que o PSdeG e están lonxe de poder disputar ese deputado.
“O 29 de novembro hai que concentrar o voto en quen pode parar a dereita e a outra dereita”, insistiu, advertindo de que calquera outra opción desde as posicións progresistas suporía “un agasallo a Feijóo e Abascal”.
Besteiro destacou tamén a importancia de contar con dúas mulleres ao fronte das candidaturas de Ourense, das que salientou o seu compromiso coa provincia e a súa capacidade para defender os intereses da veciñanza nas Cortes Xerais. Puxo especialmente en valor a experiencia, o coñecemento da realidade provincial e o traballo desenvolvido por Carmen Rodríguez Dacosta no Parlamento de Galicia, así como o compromiso de María Fernández Ojea coa defensa das necesidades da cidadanía desde o Senado.
Entre as prioridades da próxima lexislatura situou a sanidade e a educación públicas, as pensións, a dependencia e o acceso á vivenda, que reivindicou como o novo piar do Estado do benestar que os socialistas queren construír.
Carmen R. Dacosta: “Imos percorrer cada vila, cada concello e cada rúa para escoitar a xente de Ourense”
Pola súa banda, a cabeza de lista ao Congreso, Carmen Rodríguez Dacosta, asumiu a candidatura como “un reto ilusionante, pero tamén cunha enorme responsabilidade” e comprometeuse a levar ás Cortes Xerais as preocupacións, necesidades e reivindicacións dos veciños e veciñas da provincia.
Dacosta reivindicou os avances sociais impulsados durante os gobernos de Pedro Sánchez e a súa repercusión directa na vida dos ourensáns, especialmente a revalorización das pensións, o incremento do salario mínimo interprofesional e a ampliación da protección social.
A candidata destacou que estas medidas contribuíron a mellorar a dignidade e as condicións de vida de miles de persoas, pero advertiu de que aínda queda moito por facer e de que é necesario continuar ampliando dereitos.
Con ese obxectivo, anunciou que a candidatura socialista percorrerá a provincia para escoitar directamente a cidadanía, coñecer as súas demandas e trasladar propostas que dean resposta aos problemas reais de Ourense.
Reivindicou tamén o coñecemento da realidade provincial adquirido durante o seu traballo no Parlamento de Galicia e asegurou que afronta esta nova etapa coa experiencia, a ilusión e a forza dun equipo comprometido coa defensa de Ourense.
María Fernández Ojea reivindica un Partido Socialista que aposta polas mulleres e abre novos espazos de responsabilidade
A cabeza de lista ao Senado, María Fernández Ojea, puxo en valor a aposta do Partido Socialista por incorporar mulleres e perfís diferentes aos postos de responsabilidade política e agradeceu a confianza depositada nas persoas que integran as candidaturas de Ourense.
Ojea destacou que os avances impulsados polo socialismo na provincia, en Galicia e desde o Goberno de Pedro Sánchez son posibles grazas a organizacións integradas e dirixidas por persoas que se atreven a tomar decisións e a promover cambios.
Neste sentido, defendeu que o compromiso coa igualdade e coa renovación política debe traducirse en decisións concretas. “Non só hai que dicir as cousas, senón que hai que facelas e intentar cambialas cando se ten unha responsabilidade”, afirmou.
A candidata agradeceu o apoio das agrupacións local e provincial e da dirección galega do partido, en nome do conxunto das persoas que integran as listas, e comprometeuse a traballar para estar á altura da confianza recibida.
