INICIATIVAS recortes

O PP pasa olímpicamente da saúde dos ourensáns

O PP DE OURENSE PASA OLÍMPICAMENTE DA SAÚDE DOS OURENSÁNS E LAVASE AS MANS NA CLAMOROSA RECLAMACIÓN DE MELLORAS NOS SERVIZOS SANITARIOS DA PROVINCIA

A provincia de Ourense pasou a liderar o taxa de mortalidade por infarto de miocardio en Galicia sendo, ademais, 27 puntos superior a media do estado español

Isabel Gil denunciou que “temos o mesmo dereito que o resto dos galegos e este servizo é decisorio para salvar a vida, pero non estamos ben atendidos, de feito, en 2009 comezamos con dous médicos para hemodinámica e actualmente hai un”

Ourense, 26 de xaneiro de 2018. O PSdeG-PSOE da Deputación de Ourense denuncia que “o PP pasa olimpicamente da saúde dos ourensáns” xa que, no pleno do mes de xaneiro “lavou as mans ante a clamorosa reclamación de introducir melloras nos servizos sanitarios da provincia”. E que os conservadores votaron en contra da moción socialista clara e perfectamente argumentada con datos oficiais do Instituto Nacional de Estatística (INE), na que se reclama un servizo de hemodinámica as 24 horas do día e os sete días da semana. Para colmo, tamén rexeitaron outra moción sobre o permanente colapso do servizo de urxencias no hospital da terceira cidade de Galicia.

7svwcLMR

Segundo analizaron os socialistas, os datos do INE para 2016 –o últimos dispoñibles– demostran que Ourense lidera a taxa de mortaldade por cada 100.000 habitantes, cunha elevada porcentaxe do 59,7, sendo a maior das provincias galegas e a cuarta máis alta de todo o Estado español. Esta cifra sitúa á provincia 27 puntos por riba da media estatal. Na actualidade, este servizo do Hospital Universitario de Ourense unicamente está dispoñible de 8 a 15 horas de luns a venres, o que provoca traslados a un hospital das aforas de Vigo.

A deputada, Isabel Gil, fixo un repaso dos datos e recordou que “os análises do Sergas din que somos a segunda provincia con máis demora na atención o infarto, cunha demora media de 169 minutos”. A deputada recordoulle ó vicepresidente da Deputación que o PP votou a favor desta cuestión no Parlamento galego e que as súas escusas actuais son “moita literatura” pero “do realmente importante, que os veciños e veciñas estean mellor ou peor atendidos, non fala porque como médico sabe que non o pode dicir”. “Non estamos ben atendidos. De feito, en 2009 comezamos con dous médicos para hemodinámica e actualmente hai un. Temos o mesmo dereito que o resto dos galegos a non seguir morrendo por estar peor atendidos e este servizo é decisorio para salvar a vida do enfermo”, denunciou Gil.

Isabel Gil

A moción rexeitada reclama esixir á Xunta, de maneira inmediata, a implantación do servizo de hemodinámica 24 horas no CHUO. Así mesmo solicita o compromiso da deputación para reclamar a equiparación do servizo de hemodinámica de Ourense co resto dos servizos que operan as 24 horas, e garantir así o dereito a recibir atención inmediata na área sanitaria sen teren que se desprazar, evitando o demostrado risco vital. Na súa contra, os conservadores do PP empregaron o seu rolete para impor ó pleno unha vergoñenta enmenda de substitución, que unicamente é un ‘falabarato’ porque non servirá para resolver a grave marxinación que están a sufrir os ourensáns.