O PSDEG-PSOE DE PEREIRO ESÍXELLE AO GOBERNO MUNICIPAL QUE BUSQUE SOLUCIÓNS “URXENTES” PARA MELLORAR O ACCESO AO COLEXIO GUILLELME BROWN DENDE A ESTRADA OU-536
Os socialistas denuncian a situación “caótica” que se vive a diario na zona, debido a aglomeración de vehículos, o que supón un risco para a circulación tanto dos pais e nais como do resto de condutores da vía
Instan ao Concello a que na “maior brevidade posible” se poña en contacto coa Xunta de Galicia e con outras administracións para acometer as melloras pertinentes en materia de seguridade viaria
Pereiro de Aguiar, 29 de setembro de 2021. O PSdeG-PSOE de Pereiro de Aguiar denuncia a situación “caótica” que se vive a diario no acceso ao Colexio Plurilingüe Guillelme Brown, xa que tal e como denuncian, coincidindo coa entrada e saída das crianzas no centro de estudios prodúcese unha aglomeración de vehículos na OU-536. Os socialistas denuncian que esta situación supón un “grave risco” para a circulación, tanto para os pais e nais que levan as crianzas ao colexio, como para o resto de condutores, motivo polo que esíxenlle ao goberno municipal que busque solucións “urxentes” para mellorar a seguridade viaria na zona.
Dende o Grupo Municipal Socialista no Pereiro de Aguiar apuntan a que esta situación de caos circulatorio na zona “non é nova”, xa que tal e como relatan, a imaxe “repítese” cada ano durante o período escolar. Por este motivo os socialistas esixen ao goberno municipal que corrixa esta problemática, que ten o seu punto álxido durante a entrada e saída dos escolares, cando os pais e nais acoden cos seus vehículos a levar ou a buscar aos seus fillos e fillas.
Os socialistas tamén lle trasladan ao goberno municipal do Partido Popular a necesidade de que “poña cartas no asunto para resolver canto antes unha problemática que se arrastra durante os últimos anos”. Dende o PSOE de Pereiro instan ao Concello a que se poña en contacto coas administracións pertinentes para executar as melloras viarias que “regulen mellor o acceso ao colexio, mellorando a seguridade na estrada e evitando que se formen perigosas aglomeracións de vehículos”.
Os accesos ao colexio Guillelme Brown para aqueles que acceden dende Ourense, obriga a facer un cambio de sentido ao pasar a localidade de Castadón, xusto no desvío cara a aldea de Lamela. Segundo relatan os socialistas “as aglomeracións concéntranse tanto a hora de facer o cambio de sentido como no carril de incorporación a OU-536 para poder tomar o acceso de entrada ao colexio”.
Ante esta problemática os socialistas pídenlle ao goberno local do Partido Popular que “busque solucións conxuntamente coa Xunta de Galicia, titular da estrada, e outras administracións públicas para a mellora da seguridade viaria, co fin de rematar co perigo e risco que supón que cada día se concentren numerosos vehículos nunha parte de estrada na que hai ademais dúas curvas pronunciadas que dificultan aínda máis a visibilidade”.