Ourense, 29 de abril de 2022. O PSdeG-PSOE de Ourense preguntou a Manuel Baltar durante o pleno ordinario de abril, por que gastou decenas de miles de euros públicos da Deputación Provincial nunha revista na que sae unha reportaxe da empresa da súa esposa e exdeputada do PP no Parlamento de Galicia, María Josefa Caldelas.
Estas foron as preguntas dos e das socialistas:
- Por que gastou a Deputación de Ourense 17.000 euros públicos en comprar centos de exemplares da revista Coralia, en concreto, un número desta revista que no momento de redactar esta pregunta non está a venda nin na páxina web nin en ningún kiosko dos consultados?
- Considera adecuado o presidente da Deputación pagar 35 euros públicos para cada exemplar da revista? En base a que se pagou ese prezo por unidade?
- Cal é a relación do presidente da Deputación de Ourense coa empresa La Central Heladera?
- Ten algo que ver nesta compra masiva de revistas, que a única reportaxe dedicada exclusivamente a unha empresa da provincia e incluida nese número de Coralia, sexa unha reportaxe da empresa ourensá La Central Heladera, un negocio familiar do presidente da Deputación de Ourense que xestiona a súa esposa e exdeputada do PP, María Josefa Caldelas?
PSdeG-PSOE de Ourense 