O PSDEG-PSOE DE OURENSE DENUNCIA QUE O PP CONDENA O TRANSPORTE METROPOLITANO AO LIMITAR A SÚA PRIORIDADE ÓS POLÍGONOS INDUSTRIAIS DANDO A ESPALDA AOS CONCELLOS
As e os socialistas lamentan que Luís Menor e Marta Nóvoa, alcaldes do Pereiro de Aguiar e San Cibrao das Viñas, voten contra unha emenda que pretendía garantir a mobilidade da veciñanza dos oito concellos da contorna
“Menor e Nóvoa están condenando aos seus propios veciños e veciñas a seguir dependendo do coche para ir ao hospital, estudar, facer xestións ou simplemente desprazarse a Ourense”, denuncia Álvaro Vila
“É difícil entender que dous alcaldes que coñecen perfectamente as necesidades de mobilidade dos seus concellos acepten que a veciñanza quede relegada a un segundo plano. O transporte metropolitano non consiste en levar traballadores aos polígonos e esquecerse do resto da poboación. Consiste en conectar persoas, concellos e servizos”, engade
“Non imos aceptar que se chame transporte metropolitano a un servizo pensado fundamentalmente para os polígonos. Queremos transporte para os concellos, para as familias, para a xente nova, para as persoas maiores e para todas as persoas que necesitan moverse. Queremos transporte para a xente, non unha simple lanzadeira aos polígonos”, remata
Ourense, 25 de setembro de 2026. O Grupo Provincial Socialista denuncia que o Partido Popular rexeitou hoxe no pleno da Deputación Provincial a emenda presentada polo PSOE para manter o proxecto piloto das oito liñas de transporte metropolitano e optou por darlle prioridade a un modelo centrado nas conexións entre Ourense e os polígonos industriais, esquecendo por completo aos concellos e á veciñanza.
Para as e os socialistas, a decisión supón desvirtuar o obxectivo dun verdadeiro transporte metropolitano e deixar en segundo plano as necesidades de mobilidade da veciñanza de Amoeiro, Barbadás, Coles, Cenlle, Punxín, O Pereiro de Aguiar, San Cibrao das Viñas e Toén. “Estamos falando de concellos que suman máis de 33.000 habitantes, ademais dos 105.769 da cidade, o que suman un total de case 140.000 persoas que quedarán sen transporte metropolitano por mor do PP”.
O voceiro do Grupo Provincial Socialista, Álvaro Vila Araújo, cualifica de “inaceptable” a decisión do PP e sinala directamente ao presidente da Deputación, Luís Menor, e á vicepresidenta provincial, Marta Nóvoa, por ser ademais alcaldes de dous dos concellos afectados. “Luís Menor é alcalde do Pereiro de Aguiar e Marta Nóvoa é alcaldesa de San Cibrao das Viñas. Hoxe teñen que explicarlles aos seus propios veciños e veciñas porque aceptan que o transporte metropolitano se limite a conectar coa cidade os polígonos industriais e non os concellos e as persoas que viven neles”, afirma Vila.
“É difícil entender que dous alcaldes que coñecen perfectamente as necesidades de mobilidade dos seus concellos acepten que a veciñanza quede relegada a un segundo plano. O transporte metropolitano non consiste en levar traballadores aos polígonos e esquecerse do resto da poboación. Consiste en conectar persoas, concellos e servizos”, engade.
Menor e Nóvoa condenan aos seus propios veciños a depender do coche
O PSdeG-PSOE considera especialmente grave a posición mantida polo presidente e pola vicepresidenta da Deputación porque, ademais das súas responsabilidades provinciais, son os máximos responsables municipais de dous dos concellos que deberían beneficiarse dunha rede metropolitana real.
“Menor e Nóvoa están condenando aos seus propios veciños e veciñas a seguir dependendo do coche para ir ao hospital, ao médico, estudar, facer unha xestión administrativa, ir á universidade ou simplemente desprazarse a Ourense”, denuncia Álvaro Vila. O voceiro socialista lembra que o feito de que existan polígonos industriais na contorna non pode converterse nunha escusa para reducir o concepto de transporte metropolitano.
“Claro que queremos que os polígonos industriais estean ben conectados, pero queremos moito máis, queremos que unha persoa do Pereiro poida coller un autobús para ir a Ourense sen depender do coche; que unha persoa de San Cibrao poida desprazarse para acudir ao hospital ou facer unha xestión; que unha familia de Coles, Amoeiro, Toén, Barbadás, Cenlle ou Punxín teña unha alternativa real ao vehículo privado”, sinala. “Iso é transporte metropolitano. O que aprobou hoxe o PP é outra cousa”, sentencia.
O PP non quere as oito liñas
O Grupo Provincial Socialista considera que o rexeitamento da súa emenda evidencia que o PP non está comprometido coa implantación do proxecto piloto das oito liñas, pese aos anuncios realizados nos últimos anos.
“Levamos décadas escoitando falar do transporte metropolitano. Tivemos estudos, proxectos, anuncios, compromisos e presentacións. E agora, cando parecía que por fin había unha oportunidade para poñer en marcha as oito liñas, o PP decide recortar o concepto antes mesmo de que o servizo comece a funcionar”, denuncia Vila.
As e os socialistas lembran que a súa proposta pretendía garantir que o proxecto dese resposta ao conxunto dos oito concellos previstos e non exclusivamente ás necesidades de mobilidade laboral. “Oito concellos non poden desaparecer dun plumazo. Oito liñas non poden converterse nunha declaración de intencións. E o transporte metropolitano non pode transformarse nunha simple lanzadeira aos polígonos”, afirma Vila.
“Que llo expliquen aos seus propios concellos”
Álvaro Vila reclama especialmente explicacións a Luis Menor e Marta Nóvoa. “Que llo expliquen aos seus propios concellos. Que vaian ao Pereiro e a San Cibrao e lles expliquen aos seus veciños e veciñas que para o PP a súa mobilidade non é unha prioridade. Que lles expliquen por que teñen que seguir collendo o coche para acudir á cidade cando existe un proxecto para crear unha rede metropolitana”, afirma.
O voceiro socialista considera que a posición dos dous responsables provinciais “é unha mostra máis de que o PP está antepoñendo a súa estratexia política ás necesidades reais dos concellos que gobernan”.
“Un alcalde ten que defender o seu concello. Unha vicepresidenta da Deputación ten que defender os concellos da provincia. E un presidente da Deputación ten que defender a mobilidade dos cidadáns. O que non poden facer é votar contra unha proposta que mellora precisamente a mobilidade dos seus propios veciños”, sinala.
“Non queremos un transporte só para os polígonos; queremos transporte para a xente”
O PSdeG-PSOE insiste en que as conexións cos polígonos industriais deben formar parte dunha planificación integral, pero non poden ser o eixo que determine todo o modelo metropolitano. “Un sistema metropolitano ten que permitir vivir nun concello, traballar noutro, estudar na cidade, acudir ao hospital, facer compras ou acceder aos servizos públicos sen necesitar un vehículo privado para cada desprazamento. Se o PP non entende isto, é que non entendeu para que serve o transporte metropolitano”, afirma Vila.
As e os socialistas denuncian así que a decisión do PP “supón dar as costas á veciñanza da contorna de Ourense” e reclaman que Xunta, Deputación e Concello de Ourense asuman as súas responsabilidades e recuperen o proxecto das oito liñas.
“O transporte metropolitano é unha reivindicación histórica do PSOE e unha débeda histórica do PP con Ourense. Hoxe tiñan unha oportunidade para empezar a saldala e decidiron mirar para outro lado”, conclúe Álvaro Vila.
“Non imos aceptar que se chame transporte metropolitano a un servizo pensado fundamentalmente para os polígonos. Queremos transporte para os concellos, para as familias, para a xente nova, para as persoas maiores e para todas as persoas que necesitan moverse. Queremos transporte para a xente, non unha simple lanzadeira aos polígonos”, remata.
