INICIATIVAS SERVIZOS PÚBLICOS

“Feijóo, Baltar e Vázquez non son quen para decidir se un infartado morre ou vive”

O PSDEG-PSOE DEMANDARÁ NAS INSTITUCIÓNS QUE FEIJÓO, BALTAR E VÁZQUEZ DEIXEN DE MARXINAR A OURENSE E QUE IMPLANTEN O SERVIZO DE HEMODINÁMICA AS 24 HORAS NO CHUO

“Baltar e Feijóo non poden ser quen decidan se unha persoa infartada debe vivir ou morrer” denunciaron antes de preguntarse cantas persoas máis teñen que morrer camiño de Vigo para que o PP recúe

Os socialistas alertaron de manobras electoralistas do PP, a poucos meses das eleccións locais, argallando unha suposta ampliación dentro de moito tempo e logo de facer máis estudos innecesarios

Ourense, 5 de febreiro de 2019. O PSdeG-PSOE demandará no Parlamento de Galicia, na Deputación de Ourense e nos plenos dos concellos, que a Xunta deixe de marxinar á provincia e que se implante, de inmediato, o servizo de hemodinámica as 24 horas os sete días da semana. Os socialistas denuncian que os gobernos do PP deixan a Ourense sen este servizo básico, a pesar de ter a taxa de mortaldade por infarto máis elevada de Galicia e de triplicar as mortes deste tipo das provincias de A Coruña ou Pontevedra, unha vergoñenta situación que está a provocar moitas mortes innecesarias e problemas de calidade na atención urxente.

Nunha comparecencia ante o Hospital Universitario do CHUO, os socialistas explicaron que, logo de anuncio efectuado pola Consellería de Sanidade sobre a ampliación do horario deste servizo en Lugo, a provincia ourensá non pode quedar novamente ó marxe dos investimentos sanitarios especializados, ante o continuo carrusel de afrontas e pisotóns do PP ós servizos públicos. Tamén recriminaron que os populares, a poucos meses das eleccións locais, pretendan facer propaganda anunciando unha suposta ampliación deste servizo, pero dentro de moitos meses, logo de facer máis estudos innecesarios.  

Noela Blanco, Isabel Gil, Rafael Rodríguez Villarino, Elvira Lama e Adolfo González

A deputada no Parlamento de Galicia, Noela Blanco, recordou que esta iniciativa “será xa a cuarta nesta lexislatura reclamando este servizo” e declarou: “Cantas persoas máis teñen que morrer camiño de Vigo para que os tres gobernos responsables, o de Feijóo, o de Baltar e o do alcalde desta cidade, tomen decisións e implanten o que merecemos e necesitamos, porque hemodinámica as 24 horas non é ningún luxo asiático”.

Blanco tamén alertou das artimañas que o PP está a argallar para atrasar novamente o servizo continuado: “moito nos tememos que, a poucos meses das eleccións, pretendan facer algún tipo de manobra parlamentaria para volver a adiar este servizo tan necesario, e me refiro a unha iniciativa que coñecimos hoxe mesmo onde pretenden facer un novo informe, o que significaría volver a atrasar a implantación”. “Hai que ter moita cara, moito estómago, e moi pouco corazón para vir a facer electoralismo logo de sete anos de iniciativas socialistas reclamando este servizo, sempre co voto en contra do PP”, alertou.

A deputada tamén destacou que, no caso desta provincia, “non é o mesmo desprazarse para ser atendido desde O Barco que desde a cidade, e por iso Ourense ten uns tempos de atención que duplican ós de áreas como a de Santiago”. “É incrible que en pleno século XXI sexa o código postal o que decide quen vive e quen morre”, alertou

Elvira Lama, voceira na Deputación ourensá, denunciou que “os recortes na sanidade ourensá teñen nomes e apelidos e son o presidente Baltar e o presidente Feijóo” porque, segundo dixo, “Baltar e Feijóo non poden ser quen decidan se unha persoa infartada debe vivir ou morrer”. “Teñen a esta provincia discriminada con respecto ó resto de Galicia”, indicou.

“Baltar, que é especialista en viaxar polo mundo adiante con cartos de todos e todas, tiña que ser o primeiro en realizar moitas viaxes a Santiago para demandar isto ó presidente Feijóo”, declarou Lama antes de aseverar que “logo da recente implantación en Lugo, os cidadáns de Ourense non podemos ser cidadáns de segunda”. “Non queremos máis informes; queremos que esta unidade funcione xa as 24 horas do día, porque temos presentado iniciativas e mocións desde hai anos sempre sen o seu voto a favor”, asegurou.

A deputada provincial, Isabel Gil, que é médica en activo, dixo que “os tempos de atención son importantísimos nas crises coronarias para evitar chegar ó infarto de miocardio, polo tanto, a hemodinámica canto máis preto, mellor”. A deputada destacou tamén os problemas existentes coa falta de UVI móvil medicalizada nas áreas sanitarias de Verín e Valdeorras, polo que “os veciños e veciñas destas zonas teñen moitas menos probabilidades de superar unha crise coronaria aguda”, e recordou que “polo noite o helicóptero medicalizado non pode voar, polo que é necesario prestar hemodinámica as 24 horas preto”. Gil tamén recordou que hai menos dun ano e grazas ás iniciativas socialistas, acadouse a extensión do servizo durante a tarde.

O secretario do PsdeG-PSOE de Ourense, Rafael Rodríguez Villarino, afirmou que “estamos reclamando a protección básica para todos os veciños e veciñas”, logo deste “abandono do PP a un servizo tan esencial”. “É inaudito que teñamos que estar reclamando isto tendo un goberno provincial, autonómico e unha xerencia sanitaria en mans do PP, que son os responsables directos de levar isto adiante”, destacou antes de afirmar que “seremos os últimos cando o teñamos porque agora nin iso somos”.