O PSDEG-PSOE DE LEIRO DENUNCIA UN SEVERO AGRAVIO LABORAL TRAS PERDERSE O 95% DO EMPREGO PÚBLICO DO OBRADOIRO DE AGRUPACIÓN
Os concelleiros Manuel Rodríguez e Pedro José González critican que o municipio quedase relegado a unha única praza por cupo propio, desprotexendo a 15 das 16 persoas desempregadas admitidas
A acta oficial desvela que o Goberno local delegou por completo o proceso nun Tribunal composto integramente por cinco técnicos alleos, sen presenza de funcionarios de Leiro para fiscalizar o procedemento
Leiro, 10 de xuño de 2026. O PSdeG-PSOE de Leiro cualifica de “grave desequilibrio institucional e total desamparo da veciñanza” o resultado final e os mecanismos de xestión do obradoiro dual de emprego en réxime de agrupacións correspondente ao presente ciclo.
A documentación oficial publicada finalmente no Taboleiro da Sede Electrónica, tras expirar o prazo legal de cinco días reclamado pola oposición, revela unha distribución altamente desfavorable para o municipio. Das 20 prazas totais de alumnos-traballadores financiadas con fondos públicos, Leiro obtivo unha única praza de adscrición por cupo propio.
Os concelleiros socialistas Manuel Rodríguez Vázquez e Pedro José González González salientan que o segundo veciño de Leiro finalmente seleccionado tivo que acceder ao programa a través do cupo de reserva asignado ao concello promotor da agrupación, unha circunstancia que, ao seu xuízo, evidencia a escasa capacidade de influencia e defensa dos intereses locais por parte do goberno municipal.
“Estamos ante un resultado claramente prexudicial para Leiro. Mentres outros concellos conseguiron consolidar a súa representación no obradoiro, o noso municipio quedou reducido á mínima expresión. Non se defenderon os intereses das persoas desempregadas de Leiro nin se garantiu un reparto equilibrado das oportunidades laborais financiadas con fondos públicos”, afirma Manuel Rodríguez.
Pola súa banda, Pedro José González denuncia a falta de transparencia durante todo o proceso: “A veciñanza ten dereito a coñecer en tempo e forma toda a información relacionada cun programa que afecta directamente ao emprego local. O atraso na publicación da documentación e a ausencia de actualizacións na Sede Electrónica durante meses impediron un control efectivo do procedemento e deixaron ás persoas afectadas nunha situación de absoluta indefensión”.
O Grupo Municipal Socialista considera especialmente preocupante que as candidaturas procedentes de Leiro fosen tramitadas pola Oficina de Emprego do Carballiño, malia que a competencia territorial ordinaria para o municipio corresponde á oficina de Ribadavia. Para o PSOE, esta circunstancia require unha explicación detallada por parte das administracións implicadas, ao tratarse dun aspecto relevante do procedemento de selección. Ademais, os socialistas subliñan o forte desequilibrio que reflicten os datos finais da criba: dos 15 candidatos e candidatas de Leiro remitidos ao proceso selectivo, só unha persoa obtivo praza a través do cupo propio do municipio, o que representa unha taxa de éxito próxima ao 6%.
Pola contra, os restantes concellos asociados sumaban 29 aspirantes e acadaron 10 prazas, cunha porcentaxe de éxito superior ao 34%. “As diferenzas son tan significativas que resulta lexítimo preguntarse se Leiro partiu realmente das mesmas condicións que o resto de municipios participantes. O que estamos vendo é un resultado extraordinariamente desfavorable para os intereses do noso concello e das persoas desempregadas que aspiraban a unha oportunidade laboral”, sinalan Manuel Rodríguez e Pedro José González.
Ausencia de representatividade técnica e desprotección municipal
Desde o Grupo Municipal Socialista aclárase expresamente que non se cuestiona a profesionalidade, integridade nin imparcialidade dos funcionarios e técnicos que integraron o órgano de selección. As críticas diríxense exclusivamente á actuación política do alcalde de Leiro e á falta de iniciativa para garantir unha representación técnica do municipio nunha fase especialmente relevante do proceso.
Segundo consta na acta constitutiva, o Tribunal encargado das entrevistas persoais —que contaban cunha valoración de ata oito puntos— estivo integrado exclusivamente por cinco funcionarios pertencentes aos restantes concellos da agrupación. Leiro non contou con ningún técnico propio que puidese participar na supervisión do procedemento nin defender os intereses do municipio.
“O problema non son os técnicos que realizaron o seu traballo, senón que o alcalde aceptase que Leiro quedase completamente ausente do órgano encargado dunha parte decisiva da selección. Renunciouse a exercer calquera labor de fiscalización ou seguimento nun proceso que afectaba directamente a persoas desempregadas do noso concello”, engade Manuel Rodríguez.
Os datos finais reflicten que 15 das 16 persoas desempregadas de Leiro admitidas inicialmente no proceso quedaron excluídas da selección definitiva, o que supón que máis do 93% das candidaturas locais non accederon ao programa.
Ampliación da denuncia ante os Servizos Centrais da Xunta
O PSOE de Leiro lembra que o acceso ao expediente completo xa operara por silencio administrativo positivo ao superarse o prazo de cinco días naturais establecido no artigo 77 da Lei de Bases de Réxime Local.
Os socialistas sosteñen que a publicación tardía da documentación non corrixe os prexuízos ocasionados nin as posibles vulneracións do dereito á participación política, recordando ademais a resolución emitida pola Valedora do Pobo o pasado 18 de maio relativa á falta de transparencia municipal.
Por este motivo, o Grupo Municipal Socialista confirma que remitirá a acta cualificadora e a documentación complementaria aos Servizos Centrais da Xunta de Galicia en Santiago de Compostela para ampliar a denuncia formal xa rexistrada (REGAGE26e00053067050), solicitando unha revisión integral do procedemento.
“Non buscamos confrontación estéril, senón garantías. O que reclamamos é transparencia, equilibrio institucional e igualdade de oportunidades para as persoas desempregadas de Leiro. Cando se xestionan recursos públicos destinados ao emprego, a prioridade debe ser defender os intereses da veciñanza”, conclúen Pedro José González e Manuel Rodríguez.
PSdeG-PSOE de Ourense 