O PSDEG-PSOE DE OURENSE ACUSA A RUEDA E AO PP DE DESMANTELAR A SANIDADE PÚBLICA EN VALDEORRAS E ESIXE RECUPERAR OS SERVIZOS PERDIDOS
As e os socialistas participaron na manifestación convocada pola Plataforma Sanitaria no Barco, onde denunciaron que a comarca “non pode seguir pagando as consecuencias da falta de planificación e dos recortes de Rueda e da Xunta”
Reclaman máis profesionais, o reforzo do Hospital Público de Valdeorras e da atención primaria, atención especializada en pneumoloxía, unha HADO reforzada e unha base do 061 con soporte vital avanzado na comarca
“Cada servizo que non se presta, cada especialidade que non se cobre e cada paciente que ten que marchar fóra da súa comarca para recibir atención evidencia que algo está fallando na planificación da Xunta. O PP non pode seguir escudándose en explicacións administrativas mentres a cidadanía ve como se deteriora a atención sanitaria que ten ao seu carón”, apuntan
O Barco de Valdeorras, 17 de outubro de 2026. O PSdeG-PSOE de Ourense vén de participar na manifestación convocada pola Plataforma Sanitaria de Valdeorras no Barco para reclamar unha sanidade pública digna, próxima e de calidade e denunciar o deterioro asistencial que sofre a comarca. As e os socialistas, representados por alcaldes, alcaldesas, voceiros, voceiras, concelleiros, concelleiras e cargos orgánicos da comarca e provincia sumáronse á mobilización para apoiar as reivindicacións da veciñanza e esixir á Xunta de Galicia que “deixe de dar as costas a Valdeorras e adopte medidas inmediatas para recuperar servizos, reforzar os cadros de persoal e garantir unha atención sanitaria en igualdade de condicións.
As e os socialistas acusan ao presidente da Xunta, Alfonso Rueda, e ao Partido Popular de manter unha política sanitaria que debilita progresivamente os hospitais comarcais e obriga a miles de persoas a asumir máis desprazamentos, demoras e dificultades para acceder á atención que precisan. “O que hoxe vivimos no Barco é unha reivindicación clara da cidadanía, Valdeorras non acepta ser unha comarca de segunda en materia sanitaria. A veciñanza está farta de reclamar solucións mentres a Xunta continúa sen dar unha resposta á altura das necesidades do territorio. Rueda ten que deixar de mirar para outro lado e asumir a súa responsabilidade”, sinalan dende o PSOE ourensán e valdeorrés.
Os responsables provinciais socialistas subliñan que as carencias denunciadas pola Plataforma Sanitaria non son cuestións menores nin problemas illados, senón que afectan directamente á capacidade asistencial do sistema público e á calidade de vida da poboación. “Non se pode falar de igualdade mentres unha persoa que vive en Valdeorras ten máis dificultades para acceder a determinados especialistas ou precisa desprazarse fóra da comarca para recibir unha atención que debería estar garantida no seu propio territorio”, afirman.
Un hospital comarcal que precisa recursos, non máis abandono
O PSdeG-PSOE adverte de que o Hospital Público de Valdeorras precisa un reforzo efectivo dos seus recursos humanos e materiais, así como unha planificación sanitaria adaptada ás características específicas da comarca. A dispersión poboacional, as distancias, a orografía, o envellecemento e as necesidades asistenciais derivadas da actividade industrial fan imprescindible garantir unha carteira de servizos suficiente e estable.
Neste senso, as e os socialistas reclaman á Xunta que cubra as vacantes e as ausencias de profesionais, reforce a atención primaria e hospitalaria e garanta a continuidade das especialidades necesarias para evitar que a veciñanza teña que desprazarse sistematicamente a outros centros sanitarios.
O PSOE ourensán é contundente ao responsabilizar o goberno galego da situación. “Cada servizo que non se presta, cada especialidade que non se cobre e cada paciente que ten que marchar fóra da súa comarca para recibir atención evidencia que algo está fallando na planificación da Xunta. O PP non pode seguir escudándose en explicacións administrativas mentres a cidadanía ve como se deteriora a atención sanitaria que ten ao seu carón”, apuntan.
“A sanidade pública non pode depender do código postal nin do lugar no que viva cada persoa. Os veciños e veciñas de Valdeorras teñen exactamente os mesmos dereitos que os de calquera outra comarca galega, e a Xunta ten a obriga de garantir que poidan exercelos”, engaden.
Pneumoloxía, HADO e unha base medicalizada do 061
O PSdeG-PSOE lembra tamén a necesidade de atender reivindicacións concretas e especialmente relevantes para Valdeorras, como a dotación dunha atención permanente de pneumoloxía no Hospital Público, unha demanda vinculada á especial incidencia de enfermidades respiratorias relacionadas coa actividade laboral e á realidade da silicose na comarca.
As e os socialistas consideran igualmente prioritario reforzar a Hospitalización a Domicilio (HADO) e garantir recursos suficientes de atención primaria e especializada, evitando que a falta de medios hospitalarios derive en máis desprazamentos, demoras e sobrecarga para os pacientes e as súas familias.
Outra das demandas trasladadas é a implantación dunha base do 061 en Valdeorras cun recurso de soporte vital avanzado medicalizado ou con enfermaría, adaptado ás necesidades do territorio. As características xeográficas da comarca, a dispersión dos núcleos de poboación e os tempos necesarios para chegar aos servizos de referencia fan necesario, segundo defenden, reforzar a capacidade de resposta ante as emerxencias.
“Estamos falando de atención sanitaria, pero tamén de seguridade e de vidas. Valdeorras necesita profesionais, medios e recursos propios. Non abonda con anunciar plans nin con recoñecer que existen dificultades: a Xunta ten que actuar, poñer os recursos enriba da mesa e ofrecer solucións concretas”, reclaman dende o PSdeG-PSOE de Ourense.
A mobilización cidadá fronte á inacción da Xunta
O PSdeG-PSOE de Ourense pon en valor o traballo da Plataforma Sanitaria de Valdeorras e o compromiso das persoas que levan tempo reclamando melloras na atención pública. As e os socialistas consideran que a mobilización deste sábado volveu situar no centro do debate unha cuestión esencial para o futuro da comarca, a necesidade de contar con servizos públicos suficientes para vivir, traballar e envellecer con garantías.
As e os socialistas continuarán trasladando estas demandas ás institucións, tanto no Parlamento de Galicia como na Deputación de Ourense, para esixir respostas e compromisos verificables ao goberno galego. “A Xunta non pode aparecer só cando hai que facerse unha fotografía. Ten que estar cando hai que cubrir prazas, recuperar servizos e garantir que un hospital comarcal funcione co persoal e cos medios que precisa. Rueda e o PP teñen que decidir se están do lado da veciñanza ou se van seguir permitindo que a sanidade pública do interior perda capacidade asistencial”, afirman.
Dende o PSdeG-PSOE de Ourense conclúen reclamando un plan específico para Valdeorras, con financiamento suficiente, prazos definidos e medidas avaliables que permitan recuperar servizos, estabilizar os cadros de persoal e mellorar a atención sanitaria en toda a comarca. “Hoxe a cidadanía de Valdeorras volveu demostrar que non está disposta a resignarse. Nós imos seguir ao seu carón, nas rúas e nas institucións, porque defender a sanidade pública é defender a igualdade de dereitos e o futuro das nosas comarcas. A Xunta debe escoitar esta reivindicación e deixar de poñer escusas: Valdeorras merece feitos, non máis abandono”.
