ALEJANDRO DESTAR LISTE RENOVA POR UNANIMIDADE O SEU MANDATO E CONTINUARÁ REPRESENTANDO AS XUVENTUDES SOCIALISTAS NA EXECUTIVA PROVINCIAL DO PSDEG-PSOE DE OURENSE
O Congreso Provincial avala co 100 % dos votos a continuidade do seu proxecto e aproba por unanimidade a representación da organización xuvenil no Comité Provincial do PSdeG-PSOE de Ourense
Esta renovación unánime supón un respaldo ao traballo desenvolvido e á vontade de dar continuidade a un proxecto colectivo que sitúa a participación da militancia, o compañeirismo e a implicación activa da mocidade no centro da organización
Ourense, 19 de outubro de 2026. Alejandro Destar Liste foi reelixido este domingo como delegado provincial das Xuventudes Socialistas de Ourense no Congreso Provincial da organización, celebrado ás 12:30 horas. A súa candidatura obtivo o respaldo do 100 % dos votos emitidos, nunha asemblea que tamén aprobou por unanimidade a lista de representantes das Xuventudes Socialistas no Comité Provincial do PSdeG-PSOE de Ourense.
A candidatura aprobada está encabezada polo propio Alejandro Destar e integrada por Laura Liste, Miguel Gómez e Samara Rodríguez, con Brais González e Alba Figueroa como suplentes.
Esta renovación unánime supón un respaldo ao traballo desenvolvido e á vontade de dar continuidade a un proxecto colectivo que sitúa a participación da militancia, o compañeirismo e a implicación activa da mocidade no centro da organización. Destar afronta esta nova etapa co obxectivo de seguir fortalecendo as Xuventudes Socialistas de Ourense como un espazo aberto, participativo e comprometido coa transformación social.
O cargo, anteriormente denominado coordinador provincial, pasa a chamarse delegado provincial, mantendo as mesmas funcións e responsabilidades dentro da organización.
Ademais, Alejandro Destar Liste, actual secretario de Política Municipal e Acción Electoral do PSOE de Barbadás, continuará formando parte, como membro nato, da Executiva Provincial do PSdeG-PSOE de Ourense, mantendo así a representación das Xuventudes Socialistas neste órgano.
Un proxecto colectivo, sen personalismos
O delegado provincial inicia esta nova etapa coa vontade de construír unha organización na que a militancia se sinta parte activa do proxecto, integrada nun equipo de traballo e partícipe das decisións. Entre as súas prioridades están reforzar a colaboración, consolidar os vínculos entre compañeiros e compañeiras e fomentar a participación de todas as persoas que queiran contribuír ao desenvolvemento da organización.
Neste sentido, Destar defende unha forma de traballar baseada no respecto, na escoita e no compromiso compartido, “sen personalismos, facendo equipo e valorando que todas as persoas teñen sempre algo que achegar”.
As Xuventudes Socialistas de Ourense afrontan así unha nova etapa coa intención de reforzar o seu papel como espazo de participación, formación e compromiso político para a mocidade, promovendo a implicación da militancia e a construción colectiva de propostas para responder aos retos presentes e futuros.
A renovación do mandato por unanimidade representa un punto de partida para seguir traballando por unha organización xuvenil socialista forte, plural e próxima á realidade da mocidade ourensá.
